Saanen a mangipatungpal ti Malakanyang ti work suspension kadagiti opisina iti gobierno inton bigat, November 11.
Segun ken ni Executive Secretary Lucas Bersamin, “very unlikely” wenno nalabo a masuspenso ti trabaho ta sumaysayaaten ti panawen iti kaaddoan a lugar kagiddan ti panagkapsot ti Bagyo Uwan.
Maipalagip a nangiruar ti Malakanyang ti Memorandum Circular No. 106 a nangsuspenso iti trabaho dagiti ahensya iti gobierno ita nga aldaw kangrunaan kadagiti rehiyon a nakaru a naapektaran iti bagyo.
Kabayatanna, agtalinaed a suspendido ti klase iti amin a lebel inton bigat idiay National Capital Region (NCR), Cordillera Administrative Region (CAR), Region 1 agingga Region 8, Region 4A ken 4B, ken Negros Island Region.
Siguradoen ti Malakanyang nga agtalinaed a nakaalerto dagiti ahensya bayat nga agtultuloy iti panagbangon dagiti komunidad a naapektaran iti bagyo.
