Pinaglibakan ti Malakanyang nga ida-downplay iti gobierno ti agdama a sitwasyon maipanggep iti panagpangina ti presyo iti langis.
Segun ken ni Palace Press Officer USec. Claire Castro, nalawag nga awan ti krisis iti suplay iti petrolyo iti pagilian ta ti mapaspasaran ket price disruption gapu iti riribok idiay Middle East.
Impaganetget ni Castro nga ar-aramiden amin iti gobierno tapno masigurado a saan nga agkurang ti suplay ti krudo, fuel ken taraon.
Nakabantay met dagiti ahensya iti gobierno kas iti Department of Energy (DOE), Department of Agriculture (DA) ken Department of Social Welfare and Development (DSWD) tapno mangted ti tulong ken siguradoen a saan a marikna dagiti umili iti pagkurangan.
Kinunana nga uray ngumin-ngina iti presyo ket kayat ti presidente a kabaelan ti gobierno a salakniban dagiti umili.
Aminado ni Castro a saan a maliklikan a maapektaran iti Pilipinas iti krisis idiay Middle East isu nga impanawaganda iti panagtitinnulong ken panagtiped no kasapulan.
