Kinontra ti Malakanyang dagiti pammabasul ni dati a Presidente Rodrigo Duterte ken dagiti kaalyadona inaig iti napermaan a General Appropriation Act of 2025 ni Presidente Ferdinand Marcos Jr a mapapati nga adda blangko a paset ti badyet kas ti tseke tapnon mapunwan laeng ti ania a gatad.
Segun ken ni Executive Secretary Lucas Bersamin, ti kastoy a pammabasul iti maysa a dati a presidente ti pagilian ket malisyoso ken nasken laeng a kondenaren kas kriminal a balikas wenno tignay ta daytoy ket saan a pudno.
Impaganetget ni Bersamin nga amin a 4,057 a panid iti dua a napuskol a volume a naimprenta iti nasurok innem a pulo a linya ti kada panid ket nasaggaysa a naadal dagiti professional staff manipud iti kongreso ken Department of Budget and Management isu nga awan ti panid a saan a nakita a nasayaat.
Daytoy ket tapno masigurado nga awan ti pagbiddutan kadagiti gatad a nailanad iti kada proyekto ti gobierno.
