Impasigurado ti Malakanyang a natalged ti kasasaad ti salun-at ni Presidente Ferdinand Marcos Jr. iti baet dagiti agwarwaras nga impormasion nga adda stage 4 colon cancer-na.
Segun ken ni Palace Press Officer Claire Castro, saan a nasken a mamati a dagus kadagiti impormasion nga awan ti nalawag a naggapuanna, nangruna ta adun dagiti agwarwaras a fake news iti social media.
Innayonna a nasaysayaat no mangala iti impormasion manipud kadagiti lehitimo a media outlet imbes a kadagiti saan a beripikado a social media posts.
Kas pammaneknek, manamnama a personal a sumango ti presidente iti publiko para iti maysa nga event iti Malakanyang ita nga aldaw, ket idaulwanna ti oath-taking ti Vice Mayors League of the Philippines National Executive Officers.
