Respetaren ti Malakanyang ti desisyon ti Korte Suprema iti pannakaideklarar nga unconstitutional ti impeachment case kontra ken ni Vice President Sara Duterte, ngem saanna kayat a sawen nga anamonganda ti desisyon.
Segun ken ni Palace Spokesperson Claire Castro, agduma ti panangdayaw iti desisyon ken ti pammatida a husto ti nasao a banag.
Nagbotos ti Korte Suprema iti 13-0 tapno lapdan ti impeachment trial, gapu ta ibilangda a panaglabsing iti one-year rule ti Konstitusyon.
Naakusaran ni Duterte iti graft, korapsyon, ken assassination plot kontra ken ni Presidente Ferdinand Marcos Jr.
No natuloy ti trial ket napaneknekan a nagbasul, mabalin koman a madiskwalipika ni Duterte ti ania man a pampubliko a posisyon, maysa a senstitibo nga isyu nangruna ta manamnama a tumaray iti kinapresidente inton 2028.
