Kiniddaw ti Malakanyang iti grupo a Manibela no mabalin ket ipapaskuada iti publiko a saan nga ituloy ti tallo nga aldaw a transport strike inton sumaruno a lawas.
Segun ken ni Palace Press Officer Atty. Claire Castro, ammo ti grupo nga ita ket Christmas season ken adu ti maapektaran no awan ti agpasada, nangruna ita a busy dagiti tattao iti panagsagana para iti paskua.
Kunana a nasaysayaat no mapagpatangan laengen dagiti arungaingda tapno marisut a dagus ken awan ti maapektaran a pasahero.
Binilin ti Malakanyang ti Department of Transportation a kitaen a naimbag no ania ti arungaing ti grupo ket no adda pagibasaran ket nasken a marisut a dagus.
Karaman kadagiti irekreklamo ti grupo a Manibela ti panangabuso ti Land Transportation Office, ken ti delay iti panangiruar kadagiti dokumento iti jeepney registration-da.
