--Ads--

Impasigurado ti Office of the Civil Defense Region 1 nga awan ti nakaro nga epekto ti magnitude 5.5 a gingined a nangdayyeg iti Ilocos Norte ken kabangibangna a probinsia idi Martes.

Iti pannaki-uman ti Bombo Radyo Vigan ken ni Regional Director Laurence Mina, adda laeng dagiti naipadamag a naulaw ken natalimudaw nga estudiante iti Ilocos Norte National High School ngem dagus met laeng a narespondean babaen kadagiti maseknan ken volunteer.

Gapu iti dayta, naideklarar iti Ilocos Sur ti suspensyon iti klase kadagiti pampubliko ken pribado a pagadalan.  

Innayon ni Mina a daytoy ti kapigsaan a gingined sipud December 2024 a pannakarikna manen idi kadagiti nagsasaruno a panagarigengen iti kabaybayan iti ili ti Sta. Catalina, Ilocos Sur.

-- ADVERTISEMENT --

Maipalagip nga iti alas dyes trenta y otso iti agsapa idi Martes, nairekord ti Philippine Institute of Volcanology and Seismology iti nasao a kapigsa ti gingined a nagsentro iti 21 km abagatan a laud ti Pasuquin, Ilocos Norte.

Narikna ti kapigsana kadagiti sumagmamano a paset iti rehion uno ken iti Cordillera Administrative Region.