Nagpanawagan ti Liga ng Transportasyon at Operator sa Pilipinas a pagbalinenda a patas ti ipapaay a tulong ti gobierno iti sektor ti pampubliko a transportasion iti baet ti agtultuloy a panagpangina ti presio ti produkto-petrolyo iti pagilian.
Segun ken ni LTOP President Orlando Marquez, uray no makatulong ti ipapaayda a P5,000 cash assistance, rollback iti presio ti langis ken ti P10 fuel subsidy, adayo pay laeng iti dati a lebel sakbay a ngumina a husto ti presio, nga umabot iti agingga P150.
Gapu dayta, nagpanawagan ni Marquez iti diyalogo iti gobierno kaduada ti Department of Energy, Department of Transportation, tapno mapagpatangan ti nayon a tulong para iti sektor.
Bigbigen pay ti grupo dagiti dadduma nga addang ti gobierno, kas ti libre a toll para kadagiti trucker nga agipatpatulod iti taraon ngem masapul a maipatungpal amin kadagiti cargo truck, ta agpapada met nga agbaybayadda iti buwis ken addaanda iti prangkisa.
