Nakaituding nga irusat ti Department of Health (DOH) ti Ligtas Tigdas Campaign inton January 19, 2026.
Target ti Ligtas Tigdas Campaign a mabakunaan ti nasurok-kumurang 11 million nga ubbing iti intero a pagilian pakairamanan iti 2.8 million idiay Mindanao, 5.6 million iti Luzon ken 1.9 million idiay Visayas.
Kasaruno dayta iti agtultuloy a panagpangato ti kaso ti measles ken rubella iti pagilian a nangrugi kadagiti rehiyon idiay Mindanao.
Karaman iti kangatoan nga incidence rate ti Zamboanga Peninsula, Northern Mindanao, SOCCSKSARGEN ken Bangsamoro Autonomous Region in Muslim Mindanao (BARMM).
Mangisayangkat ti DOH kaduada dagiti lokal a gobierno iti nalawa a panagbakuna kontra iti measles ken rubella idiay Mindanao ken BARMM.
Iti kaudian a listaan iti DOH idi December 27, 2025 ket umaboten iti 5,123 iti kaso ti measles ken rubella iti pagilian a nangat-ngato iti 32% ngem iti 3,880 a kaso iti isu met la a panawen idi 2024.
2,567 kadagiti kaso ket ubbing nga innem a bulan agingga agtawen iti uppat.
