Maysa a lalaki ti pinaltugan ti saan pay nabigbig a suspek iti Barangay Paypayad, Candon City, Ilocos Sur.
Ti biktima ket agtawen iti tallopulo ket lima, agnaed iti nasao a lugar.
Iti pannaki-uman ti Bombo Radyo Vigan ken ni PLT. Jovelyn Antalan iti Candon City Police Station, naginom ti biktima ken ti live-in partner-na ket idi madama nga irikrikep ti biktima ti main gate-da ta rummuarda koma a mapan pay gumatang iti inomenda, nakangngegda iti putok ti paltog, isu a nagtarayda a napan iti pagtaenganda.
Ngem iti dayta a gundaway, nakarikna ti biktima nga adda nasakit ket natakuatanna nga adda tama ti paltog ti bukotna isu a naipaagas iti ospital para iti pannakatamingda.
Iti agdama, dukduktalen dagiti pannakabagi ti linteg ti pakabigbigan ti suspek ken no ania ti motibona iti pammaltog a napasamak.
Ti biktima a makaaw-awat iti pangta iti biag ket datin a natiliw gapu iti iligal ti droga nga isu ti maysa maim-imbestigaran no adda pakainaigan daytoy iti pannakapaltogna.
