VIGAN CITY – Naidungpar iti kongkreto a poste ken alad a nagdire-diretso ti Jeilord Nathan Store idiay Barangay Banaoang, Santa ni Rey Copo nga agtawen ti uppat a pulo ket innem, naasawaan ken agnaed idiay Sto. Niño ambassador, Tublay, Benguet a nagmaneho ti Toyota Hilux idi alas tres singkuwenta iti malem idi kalman, September 2.
Agpapa-abagatan a direksyon ni Copo idi napukaw na iti kontrol iti manibela iti lugan isu a naidungpar iti kongkreto a poste ken alad sa nagdire-diretso iti tiyenda a kukua ni Jerry Serrano.
Nadunor ni Serrano gapu ti aksidente idinto a ti nagmaneho iti lugan ket saan a naan-ano.
Kabayatanna, idiay met Zone 5, Bantay, nadungpar ti agpa-amyanan a Toyota Altis a minaneho ni Kelvin James Martinez nga agtawen ti dua pulo ket pito, baro ken agnaed idiay Namalangan, Santa iti agpapa-laud nga Isuzu Truck a minaneho ni Erick Macasieb nga agtawen ti tallo pulo ket maysa a taga- Malasiqui, Pangasinan idi alas una singkuwenta otso tattay parbangon.
Ngem kalpasan iti aksidente ket naglibas iti nakalugan ti Altis ngem adda iti naawat ti Bantay municipal police station a naaksidente met laeng daytoy idiay national highway ti Barangay Naguiddayan, Bantay.
Nagsagaba iti minor injury iti nagmaneho ti Toyota Altis isu a naipan iti ospital babaen kadagiti nagresponde a kameng ti municipal disaster risk reduction and management council idinto a ti driver iti truck a dinungpar na ket saan a naan-ano.
