VIGAN CITY – Nalabes a panaginom ti arak a posible a nangitunda iti pannakadadael iti panunut iti makitkita dagiti kameng ti linteg idiay ili ti Burgos a rason nu apay a nagpakamatay iti maysa a lalaki nga agtawen iti uppat a pulo ket dua iti nasao nga ili.
Segun ken ni Police Captain Roger Baling-oay Jr., hepe ti Burgos PNP, naamuan da nga awan iti parikot ti biktima iti pamilya na uray nu saan da nga agdendenna ken ti asawa na nga adda idiay Candon City nga isu kuma iti posible a rason iti nagpakamatayan na.
Sakbay iti pasamak ket nadlaw ti ina na a sabali ti garaw ti anak na isu nga idi naminsan nga aldaw a nakita na a naka-iggem ti tali ti biktima ket sinaludsod na nu pangiyusaran na ngem inbaga ti biktima a pangtali na iti pagindayunan na sa nagtaray a napan iti kabanbantayan.
Insigida a nagpaarayat ti ina ti biktima kadagiti kaarruba da ngem idi nakita da ti biktima, nakabitinen iti poon ti mangga nga awanen iti biyag na.
