VIGAN CITY – Natay ti maysa a lalaki gapu iti sinagabana a tama iti ulo kalpasan iti pannakaaksidenteda ti asawana iti national highway idiay Brgy. Man-atong, Suyo.
Nabigbig ti pimmusay a ni Malanis Tamaken, agtawen ti uppat a pulo ket siam, naasawaan, DPWH laborer 1 nga agnaed iti Sitio Naiva, Brgy. Malaya, Cervantes ta nagmaneho iti Black Honda TMX 155 kaduana ti pasaherona nga asawana a ni Minda Tamaken.
Maibasar iti inisyal nga imbestigasyon dagiti pannakabagi ti linteg, agpapadaya a direksyonda Tamaken idi nadanonda iti nasao a lugar idi naawanan ti puot ti driver isu a naidungpar iti dakkel a bato a gappuanan iti pannakaitupa iti ulona.
Naipan iti Bessang Memorial Hospital, Cervantes ti driver ngem naideklarar a Dead on Arrival.
Kabayatanna, pinasingkedan ti asawana ti biktima a kanayon iti panangibagana iti nakaru a sakit ulona.
