Maysa a lalaki nga agtawen iti duapulo ket tallo ti biktima iti pammaltog iti Barangay Bulala, Vigan City, Ilocos Sur gapu iti mapapati nga imon.
Ti biktima ket residente iti Barangay Vacunero, Sto. Domingo idinto a ti suspek ket lalaki nga agtawen iti duapulo ket maysa, residente iti Barangay IV, Vigan City.
Iti pannaki-uman ti Bombo Radyo Vigan ken ni PLTCOL. Reynaldo Mendoza Jr., naginom ti biktima iti pagtaengan ti ex-girlfriend ti suspek ken pumanaw koman babaen iti motorsiklona idin dimteng ti suspek a nakamotorsiklo ket impilitna ti sumrek iti pagtaengan ti dati a nobiana.
Idi nakita ti suspek ti biktima, dagus a pimmanaw ket sinurot met ti suspek agingga a nakangngeg ti ex-girlfriend ti suspek iti tallo a putok ti paltog.
Kalpasanna, nagsubli ti biktima iti pagtaengan ti dati a nobia ti suspek tapno agpaarayat gapu iti tama ti paltog iti bukotna.
Naipaagas iti ospital ti biktima idinto a ti suspek ket naglibas kalpasan ti pammaltog.
Datin a rinespondean dagiti pannakabagi ti linteg ti suspek ken biktima gapu iti saanda manen idi a pagkinnaawatan.
