Maysa a lalaki ti nakoriente idiay Sitio Raois, Barangay Surngit, San Juan, Ilocos Sur.
Ti biktima ket agtawen iti duapulo ket uppat, agnaed iti Barangay Lapting.
Segun iti live-in partner ti biktima, bayat ti panagturongda iti kabaybayan a nakalugan iti traysikel, nadlaw ti biktima ti natay a civet wenno ti wild cat a maawagan kas mutit a naipit iti hog wire fence.
Sinardengan daytoy ti biktima ta alaenna koma ti nasao a dingwen, ngem idi naiggananna ti alad, isu metten ti pannakakorientena.
Ginuyod ti live-in partner-na ti biktima ngem naipalladaw gapu iti kinangato ti boltahe.
Nagpaarayat met ti live-in partner ti biktima kadagiti opisial ti barangay nga isuda ti nangtulong tapno maikkat ti biktima iti alad.
Grounded ti alad manipud iti poste ti koriente nga isu ti nakaigapuan ti pannakakoriente ti biktima.
