Nadunor iti akin-kannigid nga abaga ti maysa a lalaki ta pinaltogan iti saan a nabigbig a suspek idiay Barangay Reppaac, Cabugao, Ilocos Sur.
Ti biktima ket agtawen iti limapulo ket maysa, naasawaan, construction worker nga agnaed idiay Barangay Reppaac, Cabugao idinto a saan a nabigbig ti suspek.
Nagresponde dagiti pannakabagi ti linteg iti Cabugao Municipal Police Station idi naipakaammo kadakuada iti napasamak a pammaltog ket idi nakadanonda, naipanen ti biktima iti Suero General Hospital, Cabugao para iti pannakatamingna.
Iti inisyal nga imbestigasyon, magmagna nga agmaymaysa ti biktima iti barangay road ta naggapu iti natayan idiay Barangay Bato iti nasao nga ili idi nadanonna iti nasao a lugar ket pinaltogan isuna iti saan a nabigbig a suspek iti mamindua a daras.
Nagsagaba ti biktima iti maysa a gunshot wound iti akin-kannigid nga agbagana isu a naipan iti ospital idinto a naglibas ti suspek kalpasan ti pammaltog.
Agtultuloy iti imbestigasyon dagiti otoridad mainaig iti nasao a pammaltog.
