Nadunor iti makinkannawan a paset ti takyag ken ima ti maysa a lalaki gapu iti pammaltog idiay Barangay Dayanki, Burgos, Ilocos Sur.
Nabigbig ti biktima nga agtawen iti 34, mannalon, ken agnaed iti Barangay Dayanki, idinto a ti suspek ket saan pay a nabigbigbig.
Iti pannaki-uman ti Bombo Radyo Vigan ken ni PCpt. Allan Reoliquio, Chief of Police ti Burgos Municipal Police Station (MPS), nakaawat ti tawag ti Burgos MPS maipanggep iti nasapamak a pammaltog iti nasao a lugar iti oras ti alas kuatro y media ti parabangon ita nga aldaw, Oktubre 22, ken dagusda a nagresponde.
Maibasar iti imbestigasion, matmaturog ti biktima iti kubo a maar-aramat a pagpakanan dagiti dingwenna a buryas, iti likudan ti pagtaenganda, idi nadlawna nga adda nanglukat iti aruangan isu a nakariing.
Segun ken ni PCpt. Reoliquio, kellaat a pinaltogan ti namin-adu a daras ti suspek ti biktima ngem naiggaman ti biktima ti padatem isu nga imbatona iti suspek.
Nadunor ti biktima ngem dagus met a naipan iti Ilocos Sur District Hospital-Narvacan babaen kadagiti nagresponde a kameng ti Burgos MPS.
Nataming metten ti biktima ken nasayaaten ti sitwasyonna, idinto a ti suspek ket saan pay a nakemmeg agingga ita.
Agtultuloy ti imbestigasion dagiti pannakabagi ti linteg tapno masukon ti suspek ken maamoan ti motibo ti insidente. Augie Arellano
