VIGAN CITY- Im-imbestigaran ti Sto Domingo Municipal Police Station no kameng ti gun-for-hire group ni Arnel Tabisula a taga Sived, Sto. Domingo a nakemmeg iti naisayangkat a search operation ta malaksid kadagiti bala ken paltog ket naala pay kenkuana ti bonnet, ken gloves ken mapapati nga adda pakainaigan na ti pammapatay idiay Metro Manila sabali pay ti sangsanguen na a kaso a frustrated murder idiay Ballesteros, Cagayan gapu ti mapapati a panangpaltog na iti asawa na.
Segun kenni Police Senior Inspector Arcadio Viloria, hepe ti Sto. Domingo- PNP, nag-applikar da ti search warrant gapu ta nakaawat ti report nga agpap-paputok ti paltog ti suspek ket idi inyimplimentar da idi kalman , naala kenkuana ti maysa a caliber 9mm Ingram machine pistol, silencer, dwa a magazine ,lima pulo a bala, uppat a basyo ti bala ti caliber 9mm ken syam a bala ti caliber 45 kasta pay ti uppat a driver’s license nga agduduma ti nagan na ken ti nakaikabil ket ti ladawan na.
