Nakemmeg ti maysa a lalaki a nangbagkong iti kayongna idiay Sitio Angsaben, Barangay San Juan, Cervantes, Ilocos Sur.
Ti suspek ket agtawen iti duapulo ket pito, idinto a ti biktima ket agtawen iti uppat a pulo, agpada nga agnaed iti nasao a lugar.
Iti pannaki-uman ti Bombo Radyo Vigan ken ni Police Captain Oliver Sari, awan ti riri idi kallabes dagiti dua ta adda laeng ti saanda a nagkinnaawatan ken agpadada a nakainom.
Iniddep ti suspek ti silaw iti uneg ti pagtaenganda, ket idi ginangtan manen ti biktima ta mapan mangala iti danum, binagkong daytoy ti suspek iti namin-dua a daras a nakadunoran ti akin-kannigid a kilikili ken akin-ngato a paset ti takyagna.
Naipaagas ti biktima iti ospital para iti naan-anay a pannakatamingna.
Inkalintegan met ti suspek nga immuna isuna a nadangran isu a bimmales.
Naala dagiti pannakabagi ti linteg ti kutsilyo nga agrukod iti nasurok-kumurang sangapulo ket maysa a pulgada manipud iti nakapasamakan ti pammagkong.
Adda itan iti kustodia ti Cervantes Police Station ti suspek tapno maidalan iti husto a proseso.
