VIGAN CITY – Natalgeden ti kasasaad ti biktima iti pammaltog a napasamak idiay Brgy. Silag Pacang, Sta. Maria.
Ti biktima ket ni Daniel Montero, agtawen ti uppat a pulo ket dua, naasawaan, dati nga Overseas Filipino Worker nga agned idiay Brgy. Pacang, Sta. Maria idinto a nakalibas dagiti saan pay a nabigbig a suspek kalpasan iti pammaltog.
Maibasar iti inisyal nga imbestigasyon, kadua ni Montero nga agtaktakder iti igid ti kalsada ni Rodolfo Jacinto, agtawen ti innem a pulo ket dua, naasawaan, mannalon nga agnaed idiay Brgy. Silag, Sta. Maria idin pinaltogan dagiti suspek ni Montero a naggapo iti daya a direksyon nga insigida a nakalibas.
Naipan iti Reyes Clinic Hospital idiay Brgy. Poblacion Norte, Sta. Maria ti biktima ngem naiyakar idiay Metro Vigan Cooperative Hospital, Bantay para iti pannakatamingna.
Kabayatanna, nangisayangkat iti dragnet operation dagiti pannakabagi ti linteg kalpasan iti pammaltog.
