VIGAN CITY – Nakemmeg ti maysa a suspek a nangubor iti pagtaengan ti maysa a babai idiay Barangay Dardarat, Tagudin, Ilocos Sur.
Nabigbig ti suspek a ni Manolito De Jesus Daus, agtawen iti duapulo ket uppat idinto a ti biktima ket ni Czarina Joy Adra Laron, agtawen iti tallopulo ket uppat, agpada nga agnaed iti nasao a lugar.
Nakaawat ti Tagudin Police Station nga adda riri a mapaspasamak iti nasao a lugar isu a dagus a nagrespondeda ket natakuatanda a ti suspek ket addan iti kustodia ti Kapitan ken dagiti barangay tanod.
Segun iti biktima, alas nuebe kwarenta y singko iti isu met laeng nga aldaw, nakangngegda iti riri manipud iti ruar ti pagtaenganda, isu a rimuar ti amana a mangberipika, ken nakitana ti suspek nga agtaktakder iti sangwanan ti pagtaenganda.
Iti dayta a gundaway, sinangat ti amana ti suspek ket rimsua ti saanda a nagkinnaawatan, puon ti nagbatoan ti suspek iti pagtaenganda a nakadadaelan ti tawa, aruangan ket ti stand fan da.
Gapu dayta, sumango ti suspek ti kaso a panaglabsing iti Article 327 wenno Malicious Mischief.
