Nakemmeg babaen iti naiwayat a hot pursuit operation ti maysa a lalaki a suspek iti pnnagbat idiay Sitio Cawag, Barangay Aluling, Cervantes, Ilocos Sur.
Nabigbig ti biktima a ni Francis Inali Tengedan, agtawen iti limapulo ket innem, mannalon, agnaed iti nasao a lugar.
Ti met suspek ket ni Alyas ‘Balsoto’ Soliken, agtawen iti uppat a pulo, taga-Bunga, Tadian, Mt. Province.
Sakbay ti insidente, agin-inom ti suspek ken biktima kadua ni Zaldy Casion, agtawen iti tallopulo ket siam.
Nakaturog ni Zaldy agingga a nakangngeg iti ariwawa iti aglawlaw isu a nariing ket nakitana ti agsaysayasay a dara iti ulo ti biktima idinto a ti suspek ket nakaiggem iti buneng.
Dagus nga inanawana dagiti dua ket tinawaganna ti asawa ti biktima isu a naitaray iti ospital para iti pannakatamingna.
