VIGAN CITY – Im-imbestigaran ti Sta. Catalina Municipal Police Station no apay a nagbekkel ni Erick Tadeja, agtawen ti tallopulo ket tallo nga agnaed iti Sitio Mindanao, Paratong a tattan ket agpapalaingen iti ospital.
Iti pannaki-uman ti Bombo Radyo Vigan ken ni Pol. Lt. Marcus Rafanan, matmaturog ni Tadeja kadua ti asawana idin ta nagpakada ti biktima a mapan iti kuboda ket idi napan iti kasilyada ti asawana, nakitana ti biktima a nakabitin iti pangananda babaen iti inaramatna a tali.
Idi nakita ti asawana ti napasamak, insigidan a nagpatulong ken intaraydan ti biktima iti ospital ket naisalakan met ti biagna.
Kabayatanna, pinasingkedan ti asawa ti biktima a naggapu pay iti natayan ngem awan ti naibagana pakarikutan iti pamiliada isu a burburtia met la kadakuada no apay a ginandat ti agpakamatay ti biktima.
