Manamnama a maidalan iti rehabilitation program ti maysa a lalaki a mentally ill kalpasan a napatayna ti amana babaen ti panangbagkongna idiay Barangay San Vicente, Lidlidda, Ilocos Sur.
Ti suspek ket agtawen iti duapulo ket siam idinto a ti biktima nga amana ket agtawen iti limapulo ket siam nga agpada nga agnaed iti nasao a lugar.
Iti pannaki-uman ti Bombo Radyo Vigan ken ni PCpt. Rodel Marzan iti Lidlidda Municipal Police Station, bayat a matmaturog ti biktima ket kellaat lattan a nangala ti putotna iti kutsilyo nga isu ti induyokna iti barukongna.
Segun ken ni Marzan, naminsan laeng a dinuyok ti suspek ti biktima a gappuanan ti pannakariing ti biktima ket nagpaarayat iti tulong iti karrubada isu a naipan iti ospital.
Iti baet a naipaagas ket saan a nakalasat ti ama gapu iti nauneg a dunor a sinagabana.
Kabayatanna, nangipila ti affidavit of disinterest ti pamilia ta maasianda iti suspek gapu ta patienda a saanna nga ammo ti naaramidna iti amana.
