VIGAN CITY – Nakemmeg ti maysa a lalaki gapu iti panangbagkongna iti kabsatna diay Zone 4, Barangay Bantay Abot, Narvacan, Ilocos Sur.
Nabigbig ti suspek a ni Mario Molina Reyes, agtawen iti limapulo ket maysa, construction worker idinto a biktima ket ni Ruben Moline Reyes Sr., agtawen iti limapulo ket tallo, mangngalap, agpadada nga agnaed iti nasao a lugar.
Iti inisyal nga imbestigasyon, agin-inom dagiti agkabsat ken dagiti karrubada iti sangwanan ti pagtaengan ti biktima.
Rimsua ti saan a nagkinnaawatan ti suspek ken biktima mainaig iti trabahoda, ket nasuron ti suspek ket pimmanaw.
Kalpasan ti sumagmamano a minutos, nagsubli ti suspek a nakaiggem iti kutsilyo ket binagkongna iti naminsan ti biktima.
Naipaagas ti biktima iti Ilocos Sur District Hospital-Narvacan para iti pannakatamingna, idinto a ti suspek ken ti patadem nga agrukod iti sangapulo ket uppat a pulgada karaman ti apputanna ket addan iti kustodia ti Narvacan Police Station para iti proper disposition.
