Nabayag a sinipsiputan dagiti pannakabagi ti linteg ti maysa a lalaki a nakemmeg iti buy-bust operation idiay Barangay Lang-ayan, Santiago, Ilocos Sur, maibilang a drug-cleared barangay.
Ti suspek ket agtawen iti limapulo, agnaed iti Barangay Sabangan, Santiago.
Iti pannaki-uman ti Bombo Radyo Vigan ken ni PEMS Genaro Verganio Jr, namindua a daras a naipakatan idi iti search warrant ken naminsan a na-buybust ngem kadagitoy a gundaway ket sinublianna manen ti iligal nga aramidna.
Nakumpiskar manipud iti suspek ti mapapati a shabu a mapatta-patta nga agdagsen iti 42.9 grams ken aggatad iti P291,720.
Adda pay nakumpiskar a P1,000, pitaka, caliber 28 a paltog nga adda uppat a live ammunition-na, motorsiklo ken labakara.
Maisagsaganan ti kaso a panaglabsing iti Republic Act 9165 wenno Comprehensive Dangerous Drugs Act of 2002 ken Republic Act 10591 wenno Comprehensive Firearms and Ammunition Act a sangwen ti suspek.
