VIGAN CITY – Pinasingkedan ni Police Captain Omar David, hepe ti Tagudin municipal police station a ni Jaylord Lemi Quijano nga agtawen iti tallo pulo, addaan ti live in partner, maysa a construction worker ken agnaed idiay Barangay Las-ud, Tagudin a nakemmeg idi June 20 iti buy-bust operation iti nasao a lugar ket maysa a newly identified drug personality ken ti kabsat na ket immun-unan a nakemmeg da gapu met laeng iti iligal a droga.
Segun pay ken ni David, ni Quijano ket mangnginom ken nu ti rumabii, agpagna-pagna ken agpukpukkaw iti kalsada isu a mariribukan dagiti kalugaranna a rason nu apay a kanayon nga agreklamo kadagiti otoridad dagiti karruba ti suspek.
Naala ken ti suspek iti dua a heat sealed transparent plastic sachet a naglaon iti mapapati a shabu a nagserbi a buy-bust item, sabali pay ti ikot na a dua a heat sealed transparent plastic sachet a naglaon iti mapapati a shabu ken sangaribo a pisos a marked money.
Mainaig dayta, kaso a panaglabsing ti Section 5 ken Section 11 ti Republic Act 9165 wennu Comprehensive Dangerous Drugs Act of 2002 iti sangwen ti suspek.
