Dead on arrival iti nagmaneho iti motorsiklo ta naaksidente idiay Barangay Bacar, Magsingal, Ilocos Sur iti 5:30 PM idi September 19, 2024.
Nabigbig ti nagmaneho iti Yamaha Mio i125 a ni Patrick Jones Dandin Urayanza, agtawen iti duapulo ket maysa, baro, awanan ti trabaho nga agnaed iti nasao a lugar.
Apapaamianan a direksyon ti nagmotorsiklo idi nadanonna iti nasao a lugar ket naawanan ti kontrol iti manibelana ken nag-overshoot iti agsikko a paset iti kalsada isu a naidungpar iti likod a paset iti trailer hand tractor wenno kuliglig a nakaparking iti iti outer lane a rason iti pannakaibansagna iti kongkreto a pader.
Gapu iti sinagaba a head injury, fracture iti clavicle, akin-kannawan a takyag, bara ken pannakadundunorna ket naipan iti Ilocos Sur District Hospital – Magsingal babaen kadagiti nagresponde a kameng ti Philippine National Police ken Bureau of Fire Protection – Magsingal ngem naideklarar a dead on arrival babaen ti attending physician-na.
Naamoan a naka-inom iti arak, saan a nagaramat iti protective head gear ken awan ti driver’s license ti nagmaneho iti motorsiklo idi napasamak iti aksidente.
