Naipilan ti kaso a carnapping kontra iti maysa nga agtawen-iti-duapulo ket uppat a lalaki a nagtakaw iti motorsiklo iti ili ti Sto. Domingo.
Ti met biktima ket babai nga agtawen iti tallopulo ket dua, agnaed iti Barangay Cabigbigaan.
Iti pannaki-uman ti Bombo Radyo Vigan ken ni PLT. Benito Ponce, nagreport kadakuada ti biktima mainaig iti iseserrek ti suspek iti solarda, ngem idi nakita dagiti barangay official ket kinomprontada.
Iti dayta a gundaway, nagpakada a sumrek iti pagtaengan ngem saanda a napupuotan ti pannagnana a naglibas iti likod a nangala iti motorsiklo.
Naitarayna ti lugan ta nakatulbek iti dayta a gundaway ngem nadisgrasia isu a tinarayanna met laeng.
Malaksid dayta, naitaray pay ti P3,000 manipud iti wallet a nakaipan iti compartment ti motorsiklo.
Naisayangkat ti hot pursuit operation ket nakemmeg ti suspek.
Innayon ni Ponce nga adda kaso ti suspek idiay Baguio City mainaig iti iligal a droga, ken tinakawna pay ti motorsiklo a naglugananna nga immay ditoy.
