Kaso a panaglabsing ti Republic Act 10883 wenno Anti-Carnapping Act of 2016 iti sangwen ti maysa a lalaki a nagtakaw iti motorsiklo ti maysa a mannalon idiay Barangay Rivadavia, Narvacan, Ilocos Sur.
Ti nasao a motorsiklo ket Yamaha Mio 125 a color Blue/Black a kukua ti maysa a residente iti nasao a lugar idinto a ti suspek ket lalaki nga agnaed idiay Barangay Dasay, Narvacan.
Iti pannaki-uman ti Bombo Radyo Vigan ken ni PLt. Reynald Ramos iti Narvacan Municipal Police Station, nagreport kadakuada ti biktima idi December 27, 2025 ta natakaw ti motorsiklona bayat iti panagturonna iti talon tapno agpadanum iti mulana.
Segun ken ni Ramos, apaman a nalpas ti biktima iti ubrana iti talon ket agawidkoman idi napansinna nga awan ti tulbek iti motorsiklona isu a sinapulna agingga a nakadanon iti pagtaenganda ngem idi nagsubli iti nangiparkinganna iti motorsiklo ket isu metten iti pannakatakuatna a pati ti motorsiklo ket natakawen.
Dagus nga impakaammona iti pasamak kadagiti otoridad ket iti naisayangkat a hot pursuit operation ket nasarakanda ti suspek ta adda ti witness a nangitudo iti daytoy.
Inamin met ti suspek iti inaramidna ket kinunana a siniputanna ti biktima a makapanaw sana innala ti motorsiklo ket saan a nagna iti kalsada no diketdi nagna iti kataltalonan ket dinalyasatna iti Barangay Orence agingga nagturong idiay Dasay nga isu ti pagnanaedanna.
Naduktalan a saan nga umuna a gundaway a nagtakaw ti motorsiklo ti suspek ta adda manen tinakawna idi kallabes ngem gapu ta kabagyanna iti nangaramidanna ket pinakawanda.
Agtultuloy iti imbestigasyon dagiti otoridad no posible nga adda nakaikappengan a grupo ti suspek no apay a naaramidna manen iti agtakaw iti motorsiklo.
