Dead on arrival ti maysa a lalaki gapu iti pannaka-aksidentena bayat a nakamotorsiklo iti asideg iti Calongbuyan Elementary School idiay Barangay Calongbuyan, Candon City.
Ti nagmaneho iti Orange/Black KTM Duke ket residente iti Gregorio del Pilar ngem agnanaed ita idiay Barangay Calaoaan, Candon City.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, agpapa-amianan ti drayber a mapapati a napaspas iti patarayna idin saanna a napansin ti uphill portion wenno elevated area iti kalsada isu a naawanan iti kontrol ti manibelana.
Segun ken ni Antalan, nagsagaba ti drayber iti dunor iti barukong ken lower leg isu nga insigida a naipan iti Ilocos Sur Medical Center babaen kadagiti nagresponde a kameng ti Bureau of Fire Protection ken Philippine National Police ngem saan a nakalasat.
Nagpalagip ni Antalan kadagiti agmanmaneho iti kanayon a panagannad tapno maliklikan iti pannaka-aksidente.
