Lalaki a naglibas iti checkpoint iti ili ti Tagudin, nakemmeg

VIGAN CITY – Kaso a panaglabsing iti Sec. 9 ti RA 11332 ken ti Article 151 iti Revised Penal Code ti sangwen ti maysa a lalaki a naglibas iti checkpoint idiay Brgy Bitalag, Tagudin a nakemmeg.

Nabigbig ti suspek a ni Joey Pusayen, agtawen iti duapulo ket siam, driver mechanic nga agnaed idiay No. 29, Purok Pidawan, Loakan, Baguio City.

Ginandat ni Pusayen ti sumrek ditoy probinsia babaen iti luganna a Mitsubishi Pajero Turbo Wagon ngem nabalakadan a dumalan pay nga umuna iti rapid test sakbay a makastrek.

Nupay kasta, saan a sinurot ti suspek ti naibilin kenkuana a protocol ken insigida a nagpaamianan a direksion isu a kinemmeg dagiti pannakabagi ti linteg isu nga adda itan iti Tagudin Police Station tapno dumalan iti husto a proseso.