VIGAN CITY – Agsusukot a kaso ti sangwen ni Mitchelle Mendoza, agtawen ti tallopulo ket pito, security guard iti University of Northern Philippines ken agnaed iti Bulala, Vigan City gapu iti panaglabsingna kadagiti pagannurotan iti enhanced community quarantine.
Segun ken ni PLt. Marcus Rafanan, officer-in-charge iti Sta. Catalina Municipal Police Station, nagprobokar ti suspek kabayatan iti kaaddana iti quarantine checkpoint ken pinangtaan sa pinagsawsaw-an dagiti pannakabagi ti linteg pakairamanan dagiti barangay worker a naka-duty gapu iti panangipapilitna a sumrek idiay Sta. Catalina.
Naibaga laeng ni Mendoza idi natiliwen isuna dagiti pannakabagi ti linteg nga isu nga ipilpilitna ti makastrek iti nasao nga ili ket gapu ta mapan koma mangala ti nebulizer iti putotna.
Nakakustodiyan ti suspek kadagiti pannakabagi ti linteg tapno dumalan iti usto a proseso.
