Kaso a panaglabsing iti Republic Act 12010 wenno Anti-Financial Account Scamming Act iti sangwen ti lalaki a nagilako iti bukodna a gcash/e-wallet iti probinsia.
Iti pannaki-uman ti Bombo Radyo Vigan ken ni PCpt. James Corsino iti Ilocos Sur Cyber Response Team, bayat iti panangisayangkatda ti cyber patrol iti online ket nakitada iti post a panagilako ti suspek ti bukodna nga e-wallet isu a nakitransaksyon ti maysa a pulis ket nakitinnulag nga agsarakda a gappuanan iti entrapment operation.
Segun ken ni Corniso, inlako ti suspek ti bukodna nga e-wallet iti gatad laeng a P3,000 ket saanna nga ammo iti risgo ken adda malabsingna a linteg iti panagilakona.
Inlawlawag ni Corniso a ti panagilako ti suspek iti e-wallet ket mabalin a gundawayan isuna dagiti pudno nga scammer ket amangan no inton magatang ket isu iti pagusar dagiti managgundaway nga ag-scam ket isunton iti nakai-nagan kadagiti pag-scam.
Impadana iti nasao a sitwasyon iti maysa a rehistrado a simcard a saan a mabalin nga ilako ta adda rehistrado a nagan iti akin-kukua a kas iti gcash ket verified a saan a mabalin a siasino laeng iti mangusar tapno aramatenda a pag-scam.
Innayon ni Corsino nga umuna a gundawayda a naka-encounter iti nasao a kaso wenno iti salinong ti AFASA a mabalin a pakaibaludan iti maysa agingga lima a tawen ken pannakamuelta ti P100,000 agingga P200,000 dagiti mapaneknekan a nagbasol.
