Mangiruar ti show-cause order ti National Police Commission (Napolcom) kontra iti maysa nga indibidual a nagsuot iti police uniform iti maysa a Halloween party kas pinasingkedan ni Vice Chairperson Ralph Calinisan.
Iti post-na, binallaagan ni Calinisan ti inaramid ti lalaki ket kunana a kasoanna nu saan nga agtignay iti bilin.
Segun ken ni Calinisan, ti inaramid ti lalaki ket kinaawan ti respeto kadagiti agpampanday linteg.
Saan nga innaganan ni Calinisan ti lalaki ngem nag-post kadagiti ladawan manipod iti Halloween event idiay Makati a pakakitaan iti indibidual a naka-uniporme iti PNP.
Nagpalagip ni Calinisan a mailabsing ti linteg ti panagaramat ti uniporme iti polis kas maibasar ti Article 179 iti Revised Penal Code.
Kabayatanna, nagkiddaw ti nasao nga indibidual iti naaramidna ket kinunana nga awan iti intensyonna ta inaramidna laeng dayta kas paset ti ragragsak iti Halloween.
Nagkiddaw pay isuna kadagiti polis a nasakitan ken iti institusyon.
