VIGAN CITY- Nakakustodiyan idiay Vigan City police station ni Josefino Raquepo Racho, agtawen iti innem a pulo ket uppat, balo ken agnaed idiay Brgy. Pangada, Sta. Catalina gapu iti panangaprus na iti luppo iti nakaluganan na iti tricycle a ni Nicole Remoroso Dizon, agtawen iti sangapulo ket siyam, 4th year student ti University of Northern Philippines, ken agnaed idiay Brgy.Sucoc, Narvacan.
Maibasar iti imbestigasyon dagiti otoridad, nagkalugan ni Dizon kenni Racho iti tricycle nga agturong idiay kapitolyo ket idi adda da iti asideg iti 2 Brothers Grocery, nadlawan ti biktima nga isagid-sagid ti suspek dagiti ima na iti bukot na isu a nagpasango.
Ngem idi nagpasango, narikna na nga inigganan ti suspek iti luppo na ngem inrason ti suspek a natnag iti ig-iggaman na a supot.
Gapu iti daytoy, nagpatulong ti biktima iti driver iti nagluganan da a tricycle ket inreklamo da iti nasao a lakay.
Daytoyen iti maikatlo a reklamo a nakairamanan ti suspek kas maibasar iti rekord nga iggem dagiti pulis.
