Imbutaktak ni Senador Panfilo “Ping” Lacson nga adda napateg ken testigo a mapapati a nakasagana a mangted ti impormasyon ken ebidensya kontra ken ni dati a Senate President Alan Peter Cayetano kalpasana nga inatake iti patangan iti integridad.
Segun ken ni Lacson, bilbilangenan dagiti tao nga immasideg mismo kenkuana tapno agtestigo kontra ken ni Cayetano a posible a mangipan iti padana a senador iti pagbaludan.
Nagtaud iti nabara a sarita iti dua a senador kalpasan a kwinestyunaran ni Cayetano ti panagdakkel ti naideklarar a net worth ni Lacson iti Statement of Assets, Liabilities and Net Worth (SALN)-na.
Kas tignay, impaganetget ni Lacson a lehitimo ti panagpangato ti baknangna ta arigna tallo a tawen nga awan isuna ti gobierno ken nakasapul manipod pribado a sektor, banag a makita iti income tax returns-na idi 2023 ken 2024.
Kagiddan dayta ket inakusaran ni Lacson ni Cayetano iti mapapati a P6.79 billion “pork barrel-like” budget insertions iti 2025 General Appropriations Act (GAA) ken nangibutaktak iti mapapati a “ghost” flood control projects idiay Taguig City.
