Nakita ti labor issue iti kompania a mangimatmaton iti nagreggaay a landfill idiay Rodriguez, Rizal iti naaramid a panangbisita ni Kabataan Partylist Renee Co kadagiti naapektaran a komunidad.
Gapu dayta, immapela ni Co iti liderato ti Kongreso a dagus nga agpaimbestigar tapno maikkan ti karbengan ti pamilia dagiti biktima ken matulongan dagiti survivor a naawanan iti pagsapulan.
Idi Pebrero 20 ket impila ti grupo ni Co iti Makabayan bloc ti House Resolution 815 a mangibilin iti House Committee on Environment and Natural Resources ken Committee on Labor and Employment nga imbestigaran ti panagreggaay ti landfill nga idadaulwan ti Solid Waste Integrated Management Specialist Inc. Ken Green Leap.
Impaganetget ti kongresista a kasapulan nga ipasan ti Kongreso ti Magna Carta of Waste Workers tapno masalwadan dagiti mangmangged a mangak-akup kadagiti basura agingga iti landfill.
