Mai-auction ti personal a kutsara ken tinidor ti bannuar iti pagilian a ni Jose Rizal iti Leon Gallery inton June 13 idiay Makati.
Segun ti gallery, ti silverware a naaramid iti German silver idi dekada 1880 ket mangrugi ti presyona iti P1 million.
Naipan iti inisyal a “J.R.” kas simbolo iti nagan ni Rizal.
Mapapati nga adda bukod a kutsara ken tinidor ni Rizal gapu iti amak iti pamiliana a masabidong isuna gapu iti kontrobersyal a nobelana a Noli Me Tangere kontra kadagiti prayle nga Espanyol.
Kadagita a panawen ket napateg pay ti silverware ta mapapati nga agbaliw iti kulayna no adda sabidongna kas ti arsenic.
Naipasa dagiti alikamen manipod ken ni Rizal a naited iti kabsatna a ni Narcisa Rizal ken naipasa iti anakna a ni Dr. Leoncio Lopez-Rizal.
