Nangipila ti House Resolution 421 ti Makabayan Bloc iti kamara tapno maimbestigaran ti mapapati a korapsion ken overpricing kadagiti farm-to-market road projects ti Department of Agriculture ken Department of Public Works and Highways.
Segun iti grupo, nailanad iti National Farm-to-Market Road Network Plan 2023-2028 a ti gagangay a gastos ket P9.47 milion kada kilometro, ngem nagkiddaw ti DA iti P15.91 milion kada kilometro, agraman ti nayon para iti drainage, climate proofing, ken connectivity design.
Naaramid ti plano idi 2023 iti salinong ni Presidente Ferdinand Marcos Jr kas mangidaulo ti Agriculture department, ken target ti administrasuon ti 64,155 a kilometro tib aro a kalsada idi 2023-2028.
Nadakamat pay ti grupo a sumagmamano a kontratista ti awan iti database ti DPWH, isu a nagpanawagan a maimbestigaran daytoy ti House Committee on Public Accounts ken Committee on Agriculture and Food tapno madusa dagiti nainaig.
