Siguradoen ti Ilocos Sur Provincial Police Office (ISPPO) iti kinatalged dagiti umili bayat ti panaglagip iti Undas 2024.
Iti pannaki-uman ti Bombo Radyo Vigan ken ni ISPPO Provincial Director PCOL Darnel Dulnuan, katinnulong a mangkita iti kinatalged dagiti umili a mapan kadagiti kamposanto iti force multiplier a buklen ti BPATs, REACT, Municipal Disaster Risk Reduction and Management Office (MDRRMO), Provincial Disaster Risk Reduction and Management Council (PDRRMC) ken Bureau of Fire Protection (BFP).
Segun ken ni Dulnuan, saan laeng a kamposanto iti bantayanda ta uray dagiti kalsada.
Manamnama a maisayangkat iti panag-roving dagiti kameng ti PNP iti uneg kadagiti kamposanto tapno masigurado a natalged iti panaglagip kadagiti minminatay.
Palagip ni Dulnuan kadagiti umili a mapan kadagiti kamposanto inton All Saints’ Day ken All Souls’ Day a nainget a maiparit ti panagitugot iti natadem a banag nangruna iti kutsilyo wenno buneg, paltog, makabartek a mainom, playing cards wenno mahjong, gamit a mabalin a makariribok iti sabali a kas iti videoke, karaoke ken portable speaker, ken uray dagiti pagdalus a gamit tapno saan a makasali kadagiti dumalan nga umili.
VIDEO – PROV’L DIRECTOR PCOL DARNELL DULNUAN
