Kiniddaw ni Lanao del Sur Rep. Zia Alonto Adiong iti National Bureau of Investigation a maimbestigaran ti insawang ni dati a Presidente Rodrigo Duterte idi kallabes mainaig iti panangpapatay kadagiti sangapulo ket lima a senador tapno laeng makatugaw dagiti kandidato.
Segun ken ni Adiong, no inimbestigaran ti NBI ti panangpangta ni Vice President Sara Duterte kada Presidente Ferdinand Marcos Jr., First Lady Liza Araneta Marcos, ken Speaker Ferdinand Martin Romualdez ket nasken laeng met a maimbestigaran ti insawang ti dati a presidente.
Maipalagip nga iti maysa a gathering idiay San Juan City, nagsarita ni Duterte mainaig iti umadani nga eleksyon ken iti agdama a komposisyon ti Senado.
Iti panagsaritana, insingasingna ti radikal a wagas tapno masigurado ti pangabak dagiti kaalyadona a kandidato nga isu ti panangpapatay kadakuada.
Impaganetget ni Adiong a nasken a saan a mayaleng-aleng dagiti kastoy a sarita, nangruna ta adda gundaway nga inaramid dagiti supporter n Duterte dagiti dinakamatna.
Kunana pay a saan a mabalin nga yangaw ti panangpapatay kadagiti senador isy a nasken a kitaen daytoy ti NBI.
