Naisayangkat ti kaunaan a Management Committee Meeting ti Technical Education and Skills Development Authority Region 1 a nakipasetan dagiti Provincial Director ken dagiti School Administrator iti salinong ti TESDA.
Iti pannaki-uman ti Bombo Radyo Vigan ken ni Regional Directoer Joel Pilotin, napagpapatangan iti taripnong dagiti nasken nga aramidenda manen ita a tawen kas koma iti panangipatungpalda kadagiti scholarship program ta idi napan a tawen ket adu nga alokasyon ti saanda a naipatungpal isu nga ikagumaanda nga ituloy kadagitoy a gundaway.
Ingunamgunam ni Pilotin kadagiti amin a provincial office ti TESDA a kitaenda a nasayaat dagiti kailianda nangruna dagiti awanan iti trabaho ta isu ti ipangrunada nga ipaayan iti serbisyo ken sulbarenda ti employment status ti rehion babaen iti panangiyadal kadakuada dagiti nadumaduma nga skill.
Pagyamanan met ti opisial ti gobierno iti agtultuloy a panangipasiguradoda iti pagsyaatan dagiti umili a kayatna ti agbalin nga skilled worker ken maaddaan iti trabaho tapnon ad-adda pay nga agbalinda a produktibo.
