Pinasingkedan ni Arvin Plete, Surveillance Officer ti Provincial Health Office nga awan ti nasken a pagdanagan dagiti umili iti pannakairekord ti Ilocos Sur iti umuna a kaso ti mpox.
Iti pannaki-uman ti Bombo Radyo Vigan ken ni Plete, ti kaso ket saan a gapu iti local transmission ken asymptomatic dagiti close contact wenno dagiti nakapulapolna nga isu ti monmonitoren ti Rural Health Unit.
Ti pasyente nga agtawen iti tallopulo ket uppat a babai manipud iti ili ti Tagudin ket adda pay laeng iti ospital, ket natalged met ti kasasaadna.
Inlawlawag ni Plete a sakbay pay a nagawid iti pagilian ket nayospitalen idi idiay ballasiw taaw gapu kadagiti nariknana a sintomas.
Gapu dayta ket nangisayangkat nga insigida ti local epidemiology ken surveillance officers iti imbestigasyon.
Maibalbalakad met iti publiko ti panagannadda ken sumurot kadagiti preventive measure.
