VIGAN CITY – Inlawlawag ni Brgy. Capt. Fermin Torda ti Brgy. Vacunero, Sto. Domingo nga awan ti lockdown nga impatungpalda iti nasao a barangay no di ket mangisaysayangkatda laeng iti checkpoint.
Dayta ket gapu ta naalarma dagiti kabarangayanna iti nadinamag a dagiti residente manipud kadagiti kabangibang barangay iti nasao nga ili nga adda kasona ti Covid19 ket mapan agkamang iti barangayda isu nga impamuspusanda ti ag-checkpoint.
Iti pannaki-uman ti Bombo Radyo Vigan ken ni Torda, agpatpatnag nga adda nakabantay iti checkpoint a mangkita no adda man dagiti sumrek a naggapu iti sabali a barangay iti nasao nga ili ken nangikabildan kadagiti barikada.
Nangrugi idi December 10 ti panag-checkpoint-da ket pinasingkedan ti kapitan nga awan pay ti namonitorda a naglabsing iti pagannurotan nga impatungpalda.
