Inaprubaran ti House of Representatives ti House Bill 8042 wenno National Food Security Day Act a mangituding ti October 16 a tinawen a panaglagip iti kinapateg iti seguridad iti taraon.
Segun ken ni House Majority Leader Ferdinand Sandro Marcos, naaprubaran ti gakat babaen iti 248 a pabor a botos, zero negative ken maysa nga abstention.
Gagem ti gakat a mapagtalinaed ti agenda iti gobierno kontra iti panagbisin ken nangina a presyo iti taraon manipod iti produksyon dagiti mula agingga iti husto a nutrisyon ken panagkissay iti sayang a taraon.
Madutokan ti Department of Agriculture kas lead agency iti tinawen a panagrambak kadua ti Department of Education, Commission on Higher Education, DILG, National Nutrition Council ken dadduma pay nga ahensya tapno madanon iti pagadalan, komunidad ken dadduma pay nga stakeholder iti food system.
Karaman iti mandato iti panagdisenyo dagiti programa ken kampania para iti seguridad iti taraon, bukod a produksyon, sustainable agriculture, nutrition ken panangipateg dagiti mannalon ken mangngalap.
Kasapulan a mangiruar ti DA iti implementing rules iti uneg iti innem a pulo nga aldaw manipod iti pannakaipatungpal ti linteg.
