VIGAN CITY- Nagsublin iti normal ti trabaho idiay kamara kalpasan iti panagsukat ti liderato na ket ti pannakataratipikar ti Bangsamoro Organic Law ti immuna a naaramid iti panangidaulo ni House Speaker Gloria Macapagal Arroyo.
Ti pannakiuman ti Bombo Radyo Vigan ken ni dati a Department of Budget and Management ken agdama a Camarines Sur Rep. Rolando Andaya, inbaga na a sakbay ti session ket naisayangkat ti closed door meeting da Arroyo kenni dati a House Speaker Pantaleon Alvarez ket kalpasanna, saanen a napagpatangan idiay Kamara ti isyu iti panagsukat ti liderato ket nagsubli dan iti trabaho.
Inkalintegan met ni Andaya ni Arroyo manipud kadagiti nangkontra iti pannakapili na ket inlawlawag na nga isuna laeng iti innominar dagiti agpanpanday linteg ta maysa isuna nga ekonomista ket maiyannatup dagiti ammo na ken nalawa pay iti padas na kadagiti tarigagay ti Duterte administration a mangpadur-as ti ekonomiya ken mangpasayaat ti biag dagiti umili.
Kalpasan iti panagsukat ti liderato ti Kamara, posible a maisaruno iti pannakabalasa dagiti dadduma pay a posisyon.
