VIGAN CITY – Welcome para iti ACT Teachers Partylist ti kayat ni Presidente Ferdinand Marcos Jr a maisubli ti dati nga school calendar.
Iti pannaki-uman ti Bombo Radyo Vigan ken ni Rep. France Castro, nasken laeng a makibiangen ti presidente ta adda kenkuana ti turay nga agdesisyon ti pannakaisubli ti June-March school calendar iti baet ti mapaspasaran ita a kinabara ti panawen a mangparparigat iti kasasaad dagiti mangisursuro ken agad-adal.
Kunana a nabayagen a kayatda a maisubli iti dati ti school calendar ta saan met laeng a nagbalin nga epektibo ti panagshift iti alternative delivery modes.
Numan bilang maipatungpal, kiddawenda a mabigbig latta ti 60 days proportional vacation pay dagiti mangisursuro ken maikkan ida iti naan-anay nga oras a makainana ken makapagsagana.
Malaksid dayta, awan parikut kadakuada iti July a panagseserrek ngem nasken a maikkat pay laeng ti brigada eskwela ken learning camp ket pokusan ti academics dagiti agad-adal.
