Inrusat ti Philippine Coast Guard (PCG) ken Bureau of Fisheries and Aquatic Resources (BFAR) ti maysa a Kadiwa program para kadagiti Pilipino a mangngalap idiay West Philippine Sea.
Ti inisyatiba ket naawagan a Kadiwa ng Bagong Bayaning Mangingisda Program.
Gagem ti programa a makaallukoy iti ad-adu pay a Pilipino a mangngaalap idiay West Philippine Sea nangruna idiay Panatag wenno Scarborough Shoal iti laksid iti panag-harass dagiti barko iti China.
Gagem pay ti PCG ken BFAR a mapapigsa ti presensya dagiti Pilipino kadagiti kabaybayan iti western seaboard iti pagilian.
Segun ken ni PCG spokesperson for the West Philippine Sea Commodore Jay Tarriela, naipatulod ti fish carrier a kukua iti gobierno iti MV Mamalakaya tapno ipatulod ti programa kadagiti mangngalap a Pilipino a nagbiahe iti asideg iti Panatag idi May 9 tapno gatangen dagiti naalada nga ikan ken nangted ti fuel subsidies.
Nakagatang ti Mamalakaya iti duapulo a tonelada iti napresko nga ikan a maibilang a maysa a napintas a rugi iti programa.
Kinuna ti PCG official a target ti programa a mapasayaat ti pagsapulan dagiti mangngalap a Pilipino bayat a mapaadu ti suplay ti ikan iti pagilian ken maiyetnag ti aktibo nga aktibidad iti panagkalap idiay WPS.
