VIGAN CITY – Napalaus iti ragsak ti pamilya Umalla idiay Alilem Daya, Alilem gapu ti pannakabigbig ni Cadet 1st Class Dionne Mae Umalla kas class valedictorian ti Philippine Military Academy (PMA) Mandirigma ng Bayan, Inaalay ang Sarili, Lakas at Tapang para sa Kapayapaan (MABALASIK) Class of 2019.
Segun ti ina ni Cadet 1st Class Umalla a ni Dionisia “Daisy” Umalla a maysa a retirado a mangisursuro, saan da a ninamnama a ti kakaisuna nga anak na a babai ti mangatiw kadagiti dua gasut innem a pulo ket tallo a pada na a kadete iti prestihiyoso nga akademiya ditoy pagilian ta nu agaw-awid iti pagtaengan da ket dagiti laeng certificates a maaw-awat na iti it-ited na ken awanen iti mais-istorya na kadakuada a pamilya na.
Inyistorya na a ti anak na a babai ket nasingpet ken naka-focus la unay iti panagbasa na idiay PMA ta nu agbakasyon ket dagiti pay laeng assignment na iti asikasoen na.
Innayon na nga idi damo ket ambisyon ti anak na a ti agbalin a doktor isu a kayat na idi ti agbasa ti Bachelor of Science in Medical Technology ngem gapu ta awan iti makanay a pagbasa na ta aggigiddan da nga uppat nga isakad ti ina da a single parent, napanunut ti balasang iti agadal laengen ti Bachelor of Science in secondary Education idiay Baguio City ngem saan na met laeng a naturpos ta simrek ti PMA.
Patien ni Daisy a ti ama ni Dionne a dati a kameng ti Philippine Marines ken ti manong na a nagturpos iti Philippine National Police Academy iti nangimpluwensiya kenkuana a sumrek iti akademiya.
Kabayatanna, ti biyang ti local government unit ti Alilem nga idaulwan ni Mayor Mar Ruel Sumabat, isagsagana dan ti homecoming para ti class valedictorian ti PMA Mabalasik Class ken dagiti dadduma pay a pammadayaw nga ited da iti kailyan da a nakaited iti pammadayaw iti ili da.
